ภุญฺชนฺโต โภชนํ กปฺป-มกปฺปํ วา นิเสธยํ;
ปวาเรยฺยาภิหฏํ กปฺปํ, ตนฺนาเมน อิมนฺติ วาฯ
[79]
ลาชา ตํสตฺตุภตฺตานิ, โครโส สุทฺธขชฺชโก;
ตณฺฑุลา ภฏฺฐปิฏฺฐญฺจ, ปุถุกา เวฬุอาทินํฯ
[80]
ภตฺตํ วุตฺตาวเสสานํ, รสยาคุ รโสปิ จ;
สุทฺธยาคุผลาทีนิ, น ชเนนฺติ ปวารณํฯ
[81]
ปวาริเตน วุฏฺฐาย, อภุตฺเตน จ โภชนํ;
อติริตฺตํ น กาตพฺพํ, เยน ยํ วา ปุเร กตํฯ
[82]
กปฺปิยํ คหิตญฺเจวุ-จฺจาริตํ หตฺถปาสคํ;
อติริตฺตํ กโรนฺเตวํ, ‘‘อลเมต’’นฺติ ภาสตุฯ
[83]
น กเรนุปสมฺปนฺน-หตฺถคํ เปสยิตฺวาปิ;
กาเรตุํ ลพฺภเต สพฺโพ, ภุญฺชิตุํ ตมการโกติฯ
8. กาลิกนิทฺเทโส
กาลิกา จาติ –
[84]
ปฏิคฺคหิตา จตฺตาโร, กาลิกา ยาวกาลิกํ;
ยามกาลิกํ สตฺตาห-กาลิกํ ยาวชีวิกํฯ
[85]
ปิฏฺฐํ มูลํ ผลํ ขชฺชํ, โครโส ธญฺญโภชนํ;
ยาคุสูปปฺปภุตโย, โหนฺเตเต ยาวกาลิกาฯ
[86]
มธุมุทฺทิกสาลูก-โจจโมจมฺพชมฺพุชํ;
ผารุสํ นคฺคิสนฺตตฺตํ, ปานกํ ยามกาลิกํฯ
[87]
สานุโลมานิ ธญฺญานิ, ฐเปตฺวา ผลโช รโส;
มธูกปุปฺผมญฺญตฺร, สพฺโพ ปุปฺผรโสปิ จฯ
[88]
สพฺพปตฺตรโส เจว, ฐเปตฺวา ปกฺกฑากชํ;
สีโตทมทฺทิโตทิจฺจ-ปาโก วา ยามกาลิโกฯ
[89]
สปฺปิโนนีตเตลานิ , มธุผาณิตเมว จ;
สตฺตาหกาลิกา สปฺปิ, เยสํ มํสมวาริตํฯ
[90]
เตลํ ติลวเสรณฺฑ-มธุสาสปสมฺภวํ;
ขุทฺทาภมรมธุกริ-มกฺขิกาหิ กตํ มธุ;
รสาทิอุจฺฉุวิกติ, ปกฺกาปกฺกา จ ผาณิตํฯ
[91]
สวตฺถุปกฺกา สามํ วา, วสา กาเล อมานุสา;
อญฺเญสํ น ปเจ วตฺถุํ, ยาวกาลิกวตฺถุนํฯ
[92]
หลิทฺทิํ สิงฺคิเวรญฺจ, วจตฺตํ ลสุณํ วจา;
อุสีรํ ภทฺทมุตฺตญฺจาติวิสา กฏุโรหิณี;
ปญฺจมูลาทิกญฺจาปิ, มูลํ ตํ ยาวชีวิกํฯ
[93]
พิฬงฺคํ มริจํ โคฏฺฐ-ผลํ ปิปฺผลิ ราชิกา;
ติผเลรณฺฑกาทีนํ, ผลํ ตํ ยาวชีวิกํฯ
[94]
กปฺปาสนิมฺพกุฏชปโฏลสุลสาทินํ;
สูเปยฺยปณฺณํ วชฺเชตฺวา, ปณฺณํ ตํ ยาวชีวิกํฯ
[95]
ฐเปตฺวา อุจฺฉุนิยฺยาสํ,
สรสํ อุจฺฉุชํ ตจํ;
นิยฺยาโส จ ตโจ สพฺโพ,
โลณํ โลหํ สิลา ตถาฯ
[96]
สุทฺธสิตฺถญฺจ เสวาโล, ยญฺจ กิญฺจิ สุฌาปิตํ;
วิกฏาทิปฺปเภทญฺจ, ญาตพฺพํ ยาวชีวิกํฯ
[97]
มูลํ สารํ ตโจ เผคฺคุ, ปณฺณํ ปุปฺผํ ผลํ ลตา;
อาหารตฺถ มสาเธนฺตํ, สพฺพํ ตํ ยาวชีวิกํฯ
[98]
สพฺพกาลิกสมฺโภโค, กาเล สพฺพสฺส กปฺปติ;
สติ ปจฺจเย วิกาเล, กปฺปเต กาลิกตฺตยํฯ
[99]
กาลยามมติกฺกนฺตา , ปาจิตฺติํ ชนยนฺตุโภ;
ชนยนฺติ อุโภเปเต, อนฺโตวุตฺถญฺจ สนฺนิธิํฯ
[100]
สตฺตาหกาลิเก สตฺต, อหานิ อตินามิเต;
ปาจิตฺติ ปาฬินารุฬฺเห, สปฺปิอาทิมฺหิ ทุกฺกฏํฯ
[101]
นิสฺสฏฺฐลทฺธํ มกฺเขยฺย, นงฺคํ นชฺโฌหเรยฺย จ;
วิกปฺเปนฺตสฺส สตฺตาเห, สามเณรสฺสธิฏฺฐโต;
มกฺขนาทิญฺจ นาปตฺติ, อญฺญสฺส ททโตปิ จฯ
[102]
ยาวกาลิกอาทีนิ, สํสฏฺฐานิ สหตฺตนา;
คาหาปยนฺติ สพฺภาวํ, ตสฺมา เอวมุทีริตํฯ
[103]
ปุเร ปฏิคฺคหิตญฺจ, สตฺตาหํ ยาวชีวิกํ;
เสสกาลิกสมฺมิสฺสํ, ปาจิตฺติ ปริภุญฺชโตฯ
[104]
ยาวกาลิกสมฺมิสฺสํ, อิตรํ กาลิกตฺตยํ;
ปฏิคฺคหิตํ ตทหุ, ตทเหว จ ภุญฺชเยฯ
[105]
ยามกาลิกสมฺมิสฺสํ, เสสเมวํ วิชานิยํ;
สตฺตาหกาลิกมิสฺสญฺจ, สตฺตาหํ กปฺปเตตรนฺติฯ
9. ปฏิคฺคาหนิทฺเทโส
ปฏิคฺคาโหติ –
[106]
ทาตุกามาภิหาโร จ, หตฺถปาเสรณกฺขมํ;
ติธา เทนฺเต ทฺวิธา คาโห, ปญฺจงฺเควํ ปฏิคฺคโหฯ
[107]
อสํหาริเย ตตฺถชาเต, สุขุเม จิญฺจอาทินํ;
ปณฺเณ วาสยฺหภาเร จ, ปฏิคฺคาโห น รูหติฯ
[108]
สิกฺขามรณลิงฺเคหิ, อนเปกฺขวิสคฺคโต;
อจฺเฉทานุปสมฺปนฺน-ทานา คาโหปสมฺมติฯ
[109]